मुंबई : ‘भाजपचे सरकार आल्यावर रक्तातील नात्यांमध्ये गिफ्ट डीड करताना शून्य टक्के स्टॅम्प ड्युटी आकारण्याचा निर्णय घेण्यात आला. यामुळे राज्य सरकारचे महसुलाचे ५०० कोटी रुपयांचे नुकसान झाले. असे असतानाही सध्याही रक्तातील नात्यात गिफ्ट डीड करताना त्यावर स्टॅम्प ड्युटी आकारण्याचा राज्य सरकारचा कुठलाही मानस नाही,’ असे भाजपचे महाराष्ट्र प्रदेशाचे मुख्य प्रवक्ते माधव भांडारी यांनी निवेदनाद्वारे स्पष्ट केले आहे.
‘महानगरपालिकेबाहेरील ‘पेरिअर्बन’ भागात पाच टक्के, तर महानगरपालिका क्षेत्रांत चार टक्के स्टॅम्प ड्युटी आकारली जात होती. कालच्या निर्णयातून त्यात समानता आणण्याचा प्रयत्न राज्य सरकारने केला आहे. ती पाच टक्के अशी समान ठेवण्यात आली आहे. तथापि, रक्तातील नात्यांत मालमत्ता देण्यासाठी अजूनही कोणतेही मुद्रांक शुल्क लागणार नाही,’ असेही भांडारी यांनी निवेदनात म्हटले आहे.
